Maŋemuš beivviid leat gullan ahte bohccot nelgot jámas Finnmárkkus go ii leat nohka guohtun buot bohccuide. Ikte gáibidedje stuoradiggepolitihkkarat ahte stáhta bákkus njuovvagoahtá bohccuid.
– NBR ovddasvástadus
Finnmárkku luonddugáhttensearvvi Magne Klingsheim oaivvilda ahte bággonjuovvan lea áidna čoavddus dain guovlluin gos dilli lea buot vearrámus.
Son oaivvilda ahte Norgga Boazosápmelaččaid Riikkasearvi ovttas Biepmobearráigeahčuin ja Eanandoallodepartementtain fertejit váldit ovddasvástádusa go dakkár dili dál lea čuožžilan boazodoalus..
– Njuovahagat fertejit váldit ovddasvástádusa
Norgga Boazosápmelaččaid Riikkasearvvi jođiheaddji Nils Henrik Sara lohká ahte lea boastut sivahallat NBR.
– Dás fertejit njuovahagat maid váldit sin ovddasvástadusa, lohká Sara.
Čakčat go njuovvamat álge bođii jo vuosttaš njuovvan beaivve diehtu njuovahagain ahte dat eai oastte bierggu, muitala Sara.
Son dajdá ahte NBR dalle nagodii šiehtadusa bokte oažžut dakkár čovdosa ahte boazodoallit goitge buori muddui besse njuovvat čakčanjuovvama.
– Mii doaivvuimet ahte mii diekko osttiimet áiggi, nu ahte njuovahagat galge ollet jođihit bierggu maid ledje njuovvan, muhto gávpedilálašvuohta ii leat buorránan.
– Ii riekta ahte NBR galgá vuovdit bierggu
Sara oaivvilda ahte njuovahagat eai leat dahkan maidege jođihit bierggu, ja de vurdet ahte NBR galgá leat gávpeolmmájin buot njuovahagaid ovddas.
– Dat ii oro mu mielas riekta, dá lea juoga maid mii fertet boahtte áiggis digaštallat. Gii galgá vuovdit dan bierggu maid njuovahagat ostet, leago NBR, vai leatgo njuovahagat ieža, jearrá Sara.
Deaivvada njuovahagaiguin
Boahtte vahkkus galgá son čoahkkinastit njuovahagaiguin, muhto son ii dáhto vuos dadjat maidege makkár čovdosa son oaidná dán váttes dillái.
– Dan áiggun vuos digaštallat iežan stivrrain ja luohttevašolbmuiguin miehtá Norgga, lohká Sara.