– Ællim galles ma sihtin ietjasa tjállet jienastuslåhkuj

288 viesáda la Sámedikke jienastuslåhkuj Hábmera suohkanin tjáledum. Dat merkaj 12,8 prosenta viesádijs badjel lågenangáktsa jage lij jienastuslåhkuj tjáledum.

Åvddål oabme Hábmera suohkan sjattaj ådå Hábmera suohkan jagen 2020 aktan lahkke Divtasvuona suohkanijn, de jienastuslåhko Hábmerin lassánij, valla Divtasvuonan vas binoj. Maŋemus jage åvddål sjattaj ådå suohkan lij 35 viesáda Hábmerin ja 268 viesáda Divtasvuonan jienastuslågån.

Jagen 2017 lidjin 2 prosenta viesádijs Hábmerin jienastuslåhkuj tjáledum, ja jagen 2019 2,4 prosenta.

Jagen 2017 lidjin 17,5 prosenta viesádijs Divtasvuonan jienastuslåhkuj tjáledum, ja jagen 2019 16,8 prosenta.

Åvdep Sámedikkepresidænnta Sven Roald Nystø la iesj Sámedikke jienastuslåhkuj tjáledum. Ja duodden bargaj sámeláhkajn mij la vuodo Sámediggáj ja jienastuslåhkuj.

Divtasvuonan ja Hábmerin lij álgon stuorra gássjelisvuohta oadtjot ulmutjijt ietjastit jienastuslåhkuj tjáledit, tjuottjot Nystø. Ja sån tjielggi akta stuorra sivva dasi lij bådos nuppát væráltdoaros.

– De javllin; sáme jienastuslåhko la ham huj várálasj dasi tjáledit ietjasa, dan diehti jus sjaddá dakkár doarroájgge dagu lej nuppát væráltdoaron ahte da galggin aj gádodit sámijt, de ham juo gávnnu sierra lisstan gárves, subtsas Nystø.

Nystø tjuottjot ij la vehka ållo mij la dálátjij rievddam. Ja ahte la nuorra buolvva mij la dálla tjáledum ietjas jienastuslåhkuj. Suv mielas la ájnas ulmutjijda jienastuslåhkuj tjáledit vaj sijá jiedna gullu.

– Jus ednasa diededi ietjas Sámedikke jienastuslåhkuj dáppet mijá guovllus, de ham vájkkudus le ahte dát guovllu sjaddá de nannusappot liehket ájrastum Sámediggáj, ja Sámedigge máhttá dan baktu de vissjalappot barggat daj ássjij ma lij dán guovlon stuorra hásstalussan.