Bearjadaga geassemánu 27.beaivvi rahppoi dán jagáš geassečájáhus.13 mielahttu Sámi Dáiddačehpiid Searvvis (SDS) leat searvan dan jagáš čájáhussii. Dáidagat govvejit dálá áigásaš sámi dáidaga, nugo dahkku Gjert Rognli, Asbjørn Forsøget, Annelise Josefsen, Ulrika Tapio Blind ja Aage Gaup bokte.
Sámi Allaskuvlla diehtojuohkinráđđeaddji Ánne Wuolab rabai čájáhusa duostilis sániiguin. – Joatkkaskuvlla vázzedettiin Romssas bargen Artic Galleriijas. Mu bargu lei veahkehit ráhkadit čájáhusaid. Ledjen iežan mielas šaddagoahtán hui áicil ja čeahppi.
Sámi estetihkka
– Galleriijas fitne olu vuorrasat olbmot, ja muhtinláhkai badjelgehččen sin čalmmiid ja sin vihkkedallamiid. Go ledje skuvllas oahppan dáiddahistorjjá ja hápmeáigodagaid birra. Ja dieid ektui han galggai vihkkedallat ja mihtidit maiddái sámi dáidaga, muitala Wuolab.Vuoras guossit eai duššadan mu sagaid.
Lohká sii nevvo su geahččagoahtet sámi čalmmiiguin, ohcat sámi estetihka, ja árvvoštallat dan mielde. – De muitájin siesá hearvabáttiid lebbema. Áhči náittosleaŋkkaid hervema. Eatni gámanjunne gohpama. Ja viellja suohpana njámmama.
Sámi čalmmiiguin
Anne Wuolab jáhkká dáidda ja dákkár čájáhusat go Geassi, muittuhit min áicat ja vihkkedallat. Ja vaikkoba geahčadit ođđasit min estetihka ja duddjoma. – Mu mielas leage dáidaga okta áigomuš bissehit čalmmiid ja lágabuid geahččat.
Wuolab muittihii vel ahte čakčat álgá Sámi Allaskuvllas ođđa oahpahus, duoji bacheloroahpu. Mii lea 3-jagi oahpu duojis, dáidagis ja hápmemis.
Ođđa bálgát
– Doaivumis duoji bacheloroahppu váikkuha oaidnit duoji ođđaláhkai. Ja ahte Sámis šaddet ođđa duojárat ja dáiddárat, lohká Anne Wuolab.
Birrasiid 30 logi olbmo ledje boahtán Sámi Dáiddaguovddáža rahpamii. Čájáhus bistá olles geasi.