PÅ NORSK:
(Muitaleaddji: Máret Ánne Sara)
De leai okta nieida ja bárdni, soai leigga leamašan dovdosaččat ja ovttas šaddan mánnávuođa rájis ja leaigga liikon ja gesson goabbat guoibmáseaska, ja soai ráhkisteaigga goabbat guoimmiska ja lihtodeigga náitalit. Muhto dan guottis leaigga vánhemat eallima goappašagain. Ja dan bártnis leai áhčči mii leai hui vuostá go soai riemaiga náitalit. Sii eai suovvan náitalit dan bártni dainna nieiddain. Muhto bárdni ii háliidan earránit dan nieiddas, iige nieida bártnis.
Soai hutkkaiga ahte go juo eai suova náitalit, de soai ferteba mannat sorbmái goappašagat oktanis. Ja nu soai lihtu dagaiga. De soai manaiga muhton beaivvi meahccái ovtta jeaggegáddái ja gaikkuiga hui ollu soahkevettiid ja manaiga dan jávregáddái ja čáŋaiga iežaska oktii daiguin vettiiguin hui nannosit ja njuikiiga oktanis jávrái. Olbmot álge guhkadit go soai jávkkaiga.
De sii vulge ohcat ja vázze birra dan jávrri ja gávdne dan bártni ja dan nieidda čadnojuvvon gittalagaid ovtta sparrui soahkevettiiguin. Soai leaigga jápmán čeahpálagaid dan jávregáddái. Sii válde sudno bajás ja čuhppe daid vettiid gaskat. Ja sii dolvo sudno dállui ja dagahedje gisttuid goabbáinai.
Nieidda áhčči árvalii dan bártni áhččái: - Hávdádetne go moai dan guovtti ovtta hávdái? Muhto bártni áhčči dajai: - Ean moai dan gal daga. Nieidda áhčči fasttain dajai: - Gal moai oažžu sudno bidjat ovtta hávdái, dainnago gal mon oainnán ahte soai leaba ráhkistan goabbat guoimmiska, go leaba čatnan iežaska vettiiguin gittalagaid. Muhto bártni áhčči suhtai ja logai: - Don galggat hávdádit nieiddat nuppi beallái girkogárddi, ja mon hávdádan bártnan ijabeallái girku. De soai fertiiga nu hávdádit.
Go leai gollan jagi áigi. De šadde guokte soagi. Nubbi soahki šattai bártni hávddi alde ja manai nuppi beallái, badjel girkohárjji. Ja nieidda hávddi ala šattai soahki mii manai nuppi beallái girkohárjji badjel. Ja dat guokte soahkegierragat šadde oktii. Dego livčče čadnon oktii hui nannosit, ja dat olliiga badjel girku. Ja dan bártni áhčči suhtai ja manai dállosis ja vieččai stuorra ákšu ja manai dan nieidda hávddi ala ja čuolai dan soagi gaskat.
Ja go leai čuohppan gaskat de manai bártnis hávddi ala ja čuolai dan soagi. Ja go jur čuolastii maŋemus hávi, jur go jur čuolastii maŋemus hávi, jur ovdalaš go soahki manai gaskat. De son čuolastii nu ahte ákšu galkkai iežas juolggi vuolil čibbi. Juolgi manai gaskat ja son ii eallán eambbo go moadde beaivvi maŋŋelis. De son jámii ja báhppa hávdádii su dan hávdái gos su bárdni leai.
Go leai jahki gollan de šadde fastain dat soagit seammá ládje badjel girku. Ja gierragat ledje giessasan nu nannosit oktii, dego livčče čadnojuvvon. Ja dan rájis olbmot dikte daid sogiid orrut, nugo ledje šaddan girkohárjji badjel.
Dat soagit ledje dan nieidda ja bártni ráhkisvuohta, mat manaiga oktii dainna lágiin. Dat soagit ledje mearkan dasa ahte leaigga ráhkistan nu sakka goabbat guoimmiska.