PÅ NORSK:
(Muitaleaddji: John E. Utsi)
Dán Borjjus gili olgolis lea unna váráš, man namma lea Beahceváráš. Doppe lei oktii olmmái bártniinis čuollame muoraid. Dan beaivvi lei doppe stuora bargoveahka nai čuollame ja fievrrideami daid belkkuid mat čulle.
Barggadettiin sii dávjá ledje gullan máná bárguma meahcis. Álggus diet bárdni gal suorganii, muhto ii lean guhká ovdal go fas álggii bargat ráfis. Sudno bargoguoimmit maiddái gulle dáid jienaid. Dat lei alvvas jietna, mii lei gullat dego mánáš mii bárgo jápmagielain. Ja lávii čuovvut olbmuid gitta gillái gos sii orro.
Muhto áhčči ja bárdni eaba vuolgán gosage idjii. Soai leigga ráhkadan idjadansaji meahccái, bieggasuoji. Das soai láviiga boradit ja vuoiŋŋastit ijaid.
Oktii, go dolastalaiga nu dábálaččat, leigga málestan ja boradan, ja jur áigguiga oađđát, de gulaiga fas dien alvvas jiena. Dat leai oalle balddihahtti ja issoras gullat. Bárdni suorganii sakka ja dollii áhčis gihtii. Áhčči, guhte lei oskkolaš olmmoš, jaskkodahtii su ja siđai su geahččalit nohkkat. Bárdni ráfáiduvai ja oađđái.
Áhččeolmmái ieš gal dušše fal velohalai, borggahalai biippus ja rohkadalai. Das veallá ja geahččá dollii.
De gullá soapmása gossame. Son geahččá dohko gos gulai jiena, ja nuppe bealde dola son oaidná juoidá mii čuččoda čoskka nalde. Dat leai eahpáraš. Lei unnu go jahkásaš mánáš, muhto ámadadju dego ruibu vuorrasis. Olmmái sártnui suinna ja jearai manne son, Ipmila namas, ii oačču ráfi eatnama alde, ja manne son baldala olbmuid. De muitalii eahpáraš ahte su eadni lei nisu mii ii lean náitalan. Ja muitalii vel su nama ja ahte su eadni, dalle go lei riegádahttán su, lei goddán su. Ja das maŋŋil lei giessan su boares rimssuid sisa ja coggalan su ráige beahcemáddaga sisa.
Ja go meahccebargit ledje boahtán dan vuopmái bargat, ja njeide muoraid dieđusge, de ledje vealuhan beazi jur dasa gokko eahpáraš vuoiŋŋastii. Sii ledje gárrudan ja fasttit ságastan. Dalle leai eahpáraš ráfehuvvan. Olmmái jearai jus son galgá doalvut eahpáračča dávttiid girkoeatnamii ja sivdnidit daid muolddu sisa. Eahpáraš vástida morašjienain ahte dat ii leat vejolaš. Su dávttit lea jeakkis, ja johka lea golggiidahttán ja háddjen visot su dávttiid. Dalle ceggii olmmái gieđa su guvlui ja dajai: - Na, de galggat mannat Ipmil namas ja vuoiŋŋastit ráfis agibeaivái. Dalle jávkkai eahpáraš iige šat gullon iige oidnon gosge.