NRK Meny
Normal

70 ohccis oaččui son barggu

Aitto oahppan politiijat rahčet gávdnat barggu Norggas, ja go Guovdageainnus almmuhuvvui politiijavirgái guoros, de ohce dasa 70 oahppan politibálvvá barggu. Sámegiel máhttu ja nanu bargohárjehallan sihkarasttii Anita Vasarai fásta barggu iežas ruovttugilis.

Anita Vasara

Anita Vasara oaččui politivirggi masa ledje 70 ohcci.

Foto: Marie Elise Nystad/NRK

Vasaras lea dál vuosttaš vahkku ođđa barggus politiijan ruovttugilis Guovdageainnus. 37 jahkásažžan lea Anita Vasara dál aitto geargan politijaallaskuvllas, dat áidna sámegielat dán jagi. Son lea dasa lassin oahppan buohccidivššár, ja lea maid Suodjalusas bargan olu jagiid. Anita Vasara lea Guovdageainnu sátnejođiheaddji Johan Vasara oabbá.

– Mávssolaš bargat ruovttugilis

– Lea munnje hui mávssolaš diet ahte beasan iežamet gilis ja iežamet olbmugiuin bargat ja sámegiela geavahit, dat lea dakkár mii nanne maid mu persovnnalaččat, lohká Vasara ieš, gii lea čađaheame biilabearráigeahču Guovdageainnu gilis go NRK Sápmi hupmá suinna.

Báikki olbmot illudit go besset sámástit politiijain.

– Na mii boaresolbmot maid ipmirdit maid dat meinejit go min bissehit luotta alde, lohká Marit Hætta Sara.

Illuda

Klemet Klemetsen

Guovdageainnu leansmánni Klemet Klemetsen

Foto: Dan Robert Larsen / NRK

Guovdageainnu leansmánni Klemet Klemetsen lea guhká áŋgiruššan oččodit eambbo sámegielat politiijaid. Son illuda go sus dál viimmat lea sámegielat politija.

– Dat lea dehálaš dan dihte go dáppe leat olbmot geat eai hálddaš dárogiela nu bures, de besset ovddidit áššiid nu go ieža hálidit, lohká Klemetsen.