PÅ NORSK:
(Muitaleaddji: Anne Márja Sara Buljo)
Go guođát nannáma ja vuojat rastá dan stuorra silddi Fálesnuoris de oainnát lea sildegeaži oidnosis oalle erenoamáš ceakko geađggi, jur boares biilageainnu guoras. Anne Márjá Sara Buljos lea viessu das lahkosis, ja son lea álo gullan muitalusaid dan dološ bassi geađggi birra.
Ná mun gal dien gal lean gullan nu máŋggaládje. Dološ olbmot dien bálvaledje. Mearraolbmot mat guliid bivde, dat leai máhkka guollesieidi ja jus dasa buktet dain guliin oasi dasa de manná bivdduin bures de. Ja hui áigá dat boazosápmelaččat maid dolvon dohko čorvviid. Dalle dolin, muhto eai dat dal šat ain. Lohket dat mat, muhto ii mu muittus gal ii leat ihtán dohko ii mihkkege. "Stábbán" dat lávejit gohčodit. "Áhkarnas Stábbá". Áhkarnjárga lea diekko sámegielnamma.
Ja die lea leamaš biilaluodda mearábealde dien. Ja hirbmat moalki nie go galgá mannat ja dies lea leamaš dakkár oaivi maid, muhto go Vegvesenat báhčigohte daid bávttiid bajábealde, dat cuovkanii ja gáhččái eret. Ná ahte dat ii leat šat dakkár go dat lea leamašan.
No, ja muhtun máinnastan lea munnje ahte dat lei nuorta inšenevra mii mearridii ahte dat ferte biddjot dakko bajábealde vai biilaluodda šaddá govdat. Ja dáppe nubbi. Ja dat gal Vegvesen bargit muitalit lávejit, mat ledje dalle, goappašagat maŋŋel leaba buohcan ja jápmán. Dan sieiddi billistedje!