Ikte lei Ole Ailu Gaupas ja su siidaguimmiin Egániid siiddas drámátálaš bargobeaivi.
Sii galge ealu oažžut Guovdageainnu eanu rastá Stornes bokte, golbma miila Guovdageainnu čoahkkebáikkis eret.
Eatnu lei jiekŋugoahtán, muhto ain lei muhtin sajis rabas. Plana lei vuojahit ealu, muhto de ribahedje čorraga jieŋa ala.
– Boazu geahččala mannat jieŋa mielde go ieš beassá mannat, ii dat gal čáhcái vuolgge iešmielat. Doppe lei rašes jiekŋa, ja de doddjojedje, muitala Gaup.
VÁHÁT: – Ii dat leat leaika. Lea stuora vahát go ná olu bohccot dušše etnui, lohká boazoeaiggát Ole Ailu Gaup
Foto: Privat- Loga maid:
Ožžo veahki buollinčáskadeddjiin
Čora gárttai galbma etnui, ja panihkas geahččaledje beassat gáddái.
Boazobargiin ii lean fanas, ja fertejedje riŋget veahki 110- guovddážis.
Guovdageainnu buollinčáskadeaddjit bohte fatnasiin veahkkin ja geahččaledje veahkkin gádjut bohccuid.
Sotnabeaivve gádjo buollinveahka golbma bohcco Mieronis.
– Mis lea fanas maid geavaheimmet ja gávnnaimet vihtta bohcco main heagga. Mii válddiimet muhtin bohccuid fatnasii ja earáid gesiimet ges fatnasa mielde gáddái, muitala buollinčáskadeaddji Geir Clemet Hætta. In dieđe cevze go, dadjá son.
– Stuora vahát
Gaup muitala ahte dušše guokte bohcco maid buollinčáskadeaddjit nagodedje gádjut gáddái,cevze.
– Measta buot bohccot mat manne jieŋa ala dat dušše, muitala Gaup.
Dássážii leat gávdnan 40 bohcco duššan. Odne leat ohcame leat go eambbo bohccot vel jápmán.
– Ii dat leat leaika, go nie olu bohccot leat duššan, dat lea stuora vahát midjiide, dadjá Gaup.
Hástaleaddji skábman
Son muitala ahte boazobargu lea šaddan váddáseabbon, go bivvalit dálkkit dagahit ahte jávrrit ja jogat eai jieŋo šat nu árrat go ovdal.
– Orro gal dábálaš ahte ná rašši jiekŋa daid muttuid. Dat dagaha stuorat hástalusaid johtima ektui. Ii leat nu somá coggat ealu čáhcái skábman, dadjá Gaup.
SOTNABEAIVVE: Sotnabeaivve fertejedje Guovdageainn buollinčáskadeaddjit gádjut bohccuid mat ledjen doddjon etnui Mierona bokte Guovdageainnus.
Foto: Kautokeino brannvesenDán čavčča leat Guovdageainnu buollinčáskadeaddjit jo go golbmii šaddan veahkehit go bohccot leat doddjon etnui, muitala buollinčáskadeaddji Geir Clemet Hætta.
– Vuosttaš lei moadde vahkku áigi ja de ledje guokte maŋŋálaga, sotnabeaivve ja vel ikte, dadjá Hætta.
Guovdageainnu buollinveahka lei maid sotnabeaivve gádjume bohccuid.
Son muitala ahte leat lága bokte geatnegahtton veahkehit gádjut elliid maid.
- Loga maid:
- Loga maid:
