PÅ NORSK:
(Muitaleaddji: Nils Johansen Eira)
Mu namma lea Nils Eira, gohčodit maiddái Iskon Máhte Niillasin. Mii leat dal dáppe Gearrutnjárggas, Riehpovuonas. Dán orohagas lea muitaluvvon dalle dolin. Dat leai okta olmmái, mii máhtii dakkár goansttaid maid eará olbmot eai máhte. Ja dat muitalii ieš dat olmmái guđe ládje dat oaččui daid goansttaid. Ja dat lei dakkár mii liikui veaháš dálkasa váldit, drámmaid váldit. Ja son leai oahpásmuvvan ovtta mearraolbmáin, mii leai maid dakkár mii liikui dan seammá. Ja de sáhkalagaid bođiiga ja dál dat min orohaga olmmái lohká: - It go oahpat sutnje maid diekkár goansttaid. Ja dat gal soabaiga de: - Na jus juo háliidat oahppat, gal don de vuolggát su mielde. Ja gal dat neavvui : - Galggat mannat dohko Ráhkarávjju girkogárddi lusa. Dat leai die juo čakčamánnu, sevdnjes ijat.
Manai dohko girkoverráhii gosa leai gohččojuvvon mannat. Ja dat dál vurddii doppe. Šattai gaskaidja. De boahtá verdde. Sus lea soabbi gieđas. Lohká sutnje: - Dál de galggat báhcit dása čuožžut, son manná dan girkogárddi sisa. Ja maid dál oainnát ja it oainne. Oaidnit don gal boađát, muhto ale fal gieđat atte. Ale fal geige gal gieđa. Ja nu dat manai dat verdde girkogárddi sisa. Oinnii mot manai ja hušku daid hávdegeđggiid. Ja nu jávkkai dohko seavdnjadasa sisa.
Ii hal lean ge guhká de hirbmadit šurret olbmot doppe girkogárddis. Gal lea dakkár šurrá. Oaidná, de gal álget boahtit doppe, ráidun bohtet vilges olbmot, dohko verráha guvlui. Na dat dat gal oaidná, diet dat gal leat jámehat. Dan dat gal leat. Mannet dakko su meaddel guhkes ráidun. Muhto de boahtá okta olmmái. Dat lea dakkár mainna lea áiddo jugadan, dan seammá geasi. Ja dat gis jámii, dat olmmái. Na dat dat gal fuobmái su ja nu geaigguha sutnje gieđa. Sus gal nu hállu livččii verdde buorástahttit, muhto lei gullan ii ábut gieđa gal addit. Dat manai, geahčai vel sutnje ja manai. Ja gal doppe bohte, mánát bohte. Vel velá okta mii gieđavuolde guttii oaivvi, iežas oaivvi. Nu dat manne. Gal dat lei dakkár ráidu. Muhto loahpas bođii dat su verdde. Govččai girkoverráha. Ja logai: - Na, dál dus lea dat oahppu man don leat bivdán.
Ja nu dat šattai dán rájis ahte das gal leai dakkár fápmu. Biillaid dat bissehii. Sáhtii vaikko maid. Dat lei goit oktii nu ahte, boaresbárdni hal son leai, dat lei gávdnan moarselágáža hotealla olggobealde. Man son leai álgán sallut ja nu. De bohte nuppit buorit ja rihpe dan nieidda ja gaiko biilii. Ja vuoddjájedje dainna nieiddain. Logai goit dat áddjá: - Doalvubehtet gal, muhto ehpet guhkás gal olle. Ja nu lei ge, go vuoddjájedje de bisánii dat biila. Ii mana ovddos, vaikko mii livččii. Muhto go geahččalit murddihit, na, maŋos dat gal manná. Na, de šadde murddihit dan máŋga gilomettara fas dohko hotealla lusa. Guođđit dan nieidda dasa. Na, de gal biila manai fas. Na, dat besse mannat ja son oaččui dan nieidda iežas fárrui.
Dat lei olu jagiid sus diet oahppá. Muhto dat šattai dan mađe garra hommá diet ahte manai goit fas dan verddes lusa ja logai: - Ii dat dát gal, dat šaddá ila olu gal, dát gal. Livččii nohkka go olbmuid máhtášii buoridit. Ii son dan noaidegoanstta dađi eambbo háliidivčče. Na, logai dat verdde: - Na, mii bat das. Moai vulge dohko seammá sadjái, dohko dan girkogárddi lusa. Ja, dat manai dohko. Ja dat lei ožžon dan dieđu čuožžut das verráhis. Ja rahpat dan verráha. Na, son čuožžu dan rabas verráha guoras. Na, dál dat oaidná. Bohtet doppe, olggobealde girkogárddi, doppe luoddaráiggi. Doppe álggii dat olmmoššurra, ja sisa vázze girkogárdái. Ja seammá olbmot, mat ovddit hávi manne, dat seammá jámehat. Ja verdde maiddái. Geaigguha vuot gieđa sutnje. Dál son gal diđii, ii sutnje galgga gieđa gal addit. Nu dat manne. De bođii loahpas dat verdde. Ja govččai girkogárddi verráha ja logai: - Dál don leat dušše guvhllár, dál it eat šat noaidi. Nie lei dien rádjái.