PÅ NORSK:
(Muitaleaddji: Ole Henrik Gaino)
Ole Heandarat Gaino orro Láhpoluobbalis das veaháš gaska Kárášjot guvlui. Son lea eallinagis eallán ja bargan meahcis. Ja go doppe vánddardii ja orodii de oahpai son oba fargga ahte leat vierut maid ferte váldit vuhtii. Vaikko vádjolatge okto ieš sevdnjes čakčameahcis ge.
Dat leai okta fearán. Mon ledjen vánddardeamen dáppe guhkkin meahcis muhtomin. Čakča dat lei, sevdnjes áigi. Ja de mon sevnnjoduvven dohko meahccái. Ja lei doppe hui suhkkes soahkevuovddit ledje. Ja mon in deaivan šat go sevnnjoduvven. Mon in deaivan šat dohko gosa galgen. Mus lei beana velá fárus, ja mon jurddahin mon ferten bisánit ja idjadit. Ii dat lean gal čoaskkis. Mon dahken dola dieđusge. Stuora dola ja dolastin eahketbotta. Ja de ordnejin, meinejin veaháš nohkkat. Čullen duorggaid ja stellejin. Ja mon ledjen veaháš nohkkan das dollagáttis. De gullástin veaháš, dat boahtá: Gulan dat leai juoga mii boahtá. Gullo, vázzá. Leai nu seavdnjat. Mon in oainne gal. Ja mu beana riemai nu ballat. Nu geahččá dohko. Ii dat jietnat maidege. Manai mu sealggebeallái dat beana. Na, mon álgen duođas geahččat. Mii lea dat?
Fáhkkestaga de bođii mu sealggebealde. Gos mon in lean vuordime. Na, olmmoš dat dát goit lea. Váccii mu julggiid duohkái go mon veallán das. Mon dieđusge njuikejin veaháš čohkkut. Ja gulan dat lea juoga mii boahtá. Vázzá. Ja mon dieđusge dan dola bosádin nu ahte dat buolligođii. Šattai hui buorre čuovga birra dakko. De dat bođii dat, olmmoš dat lei. Bođii dasa mu julggiid duohkái ja dolla dat dego játtihii. Ii šat oaidnán eambbo go ahte lea juoga čáhppat. Ja gulan julggiid duohkái bođii dat. Ja mon dadjen hui fastit. Lohken: - Dus lea buorre dilli mannat birra dan dola. Ja dajai munnje: - Manne don leat mu bálgá nala bisánan? Mon lohken: -Bálgá? Mana duohko birra dan dola. Dus lea buorre dilli mannat birra. Ja, mon dadjen veaháš fastit dainna. Muhto dat manai, dat jeagadii ja manai. Dohko manai. Mon dat gal balddáskin maŋŋil ja sirden earásadjái. Ja mon lean gullan olbmuin. Dat galggai jearrat lobi go galggat máhkaš lávu dahje telttá, dahje galggat idjadit meahcis. Ii galgga summal, don galggat jearrat lobi. Hupmat das dan báikkis gosa bisánat. Jus dat lea boares goahtesadji, de lea hui dehálaš jearat vuos lobi. Ja de oaččut nu ráfi das oađđit ja orrut nu guhká go háliidat. Dan in lean mon dahkan. Muhto das maŋŋil lávejin mon dan dahkat. Lávejin okto ieš hupmat go okto lean. Jearan lobi. Ja de lea nu ráfis alo vánddardan ja idjadallan meahcis. Nie lei diet fearán.