NRK Meny
Normal

32-jahkásaš jođihišgoahtá Finnmarken áviissa

Dagbladet Finnmarken áviissa stivra lea ikte mearridan virgádit Anniken Renslo Sandvik (32) ođđa váldodoaimmaheaddjin.

Anniken Renslo Sandvik

Anniken Renslo Sandvik lea jo guovvamánu rájes doaibman Finnmarken áviissa váldodoaimmaheaddjin. Dál son beassá joatkit bissovavaččat dán virggis.

Foto: Ole Gunnar Onsøien

32-jahkásaš álgá váldodoaimmaheaddjin maŋŋá go Eilif Andreas Aslaksen (53) árabuš dán dálvve celkkii eret virggistis.

Aslaksen bargagođii váldodoaimmaheaddjin golggotmánu 1. beaivve jagis 2015.

– Min sápmelaš lohkkit sáhttet vuordit dan seammá go min eará lohkkit; buori guovlluáviissa mii muitala áššiin mas olbmot beroštit, lohká Renslo Sandvik NRK Sápmái.

Eilif Aslaksen

Eilif Andreas Aslaksen ii šat háliit jođihit Finnmarken áviissa.

Foto: Paul K Egell-Johns / NRK

Anniken Renslo Sandvik lea bargan Finnmarken áviissas jagi 2011 rájes, earret eará journalistan ja neahttasiiduhoavdan. Son lea doaibman sadjásaš váldodoaimmaheaddjin guovvamánu rájes.

Son lea journalistaoahpu váldán Bådoddjo allaskuvllas, gos son gearggai jagis 2007. Seammá jagi sus lei oahpahallibargu Finnmarken áviissas ovdalgo manai guokte jagi johtit máilmmis ja studeret Bankokas Thaieatnamis.

– Nuorta-Finnmárkkus ásset olu sápmelaččat, ja dát galgá ain vuhttot min áviisačállosiin. Dán oktavuođas leat erenoamážit Unjárga ja Deatnu midjiide dehálaččat. Mii áigutge bargat nu, ahte Finnmarken ain lea deháleammos diehtogáldu báikkálaš áššiide boahttevuođas, čilge Anniken Renslo Sandvik.