Vuordán vihtta jagi boazo­mearkka

– Dat gal lea beare heitot, dat ii sáhte váldit máŋga jagi meannudit diekkár dehálaš áššiid, lohká son.

Nina Karita Eira ozai boazomearkka bárdnásis 2019:s, muhto de lei muhtin gii cakkai mearkka ja golai golbma jagi ovdal oaččui vástádusa ahte ii oaččo mearkka.

Son ozai ođđasit 2022 giđa ja skábmamánus seamma jagi bođii vástádus ahte áššemeannudeapmi ádjána jagi, ja ahte meannuduvvo golggotmánu 2023:s. Das maŋŋel ii leat šat gullon mihkkege áššis.

Eira lea sádden sihke maila ja viggan jearahit stáhtahálddašeaddjis, muhto ii leat ožžon vástádusa.

Čuohcá sihke Ninai ja su bárdnái

Sámi boazoguohtunguovlluin galget buot bohccot merkejuvvot eaiggádii registrerejuvvon mearkkain ovdal golggotmánu 31. beaivvi seamma jagi go boazu lea šaddan.

Ovdalgo mearka váldojuvvo atnui, galgá mearkalávdegoddi dohkkehit dan. Leat mearkalávdegottit iešguđet guovlluin mat meannudit boazomearkaohcamiid, ja stáhtahálddašeaddji lea čállin dán lávdegottis.

Eadneváhnen oaidná ahte dat čuohcá su mánnái go ii leat vel ožžon iežas mearkka.

– Dasa gal lea hui váivi, dál lea máŋga jagi leamaš mearkumis ja ii ge leat vel beassan iežas mearkka merket, ja eai ge leat ealus iežas mearka bohccot.

Váhnen jurddaša ahte de ii soaitte boahtit dat miella bargat bohccuiguin.

Sullii 280 ohcama vuordime

Romssa ja Finnmárkku stáhtahálddašeaddji doaibmi boazodoallodirektevra, Torhild Gjølme, muitala ášši maŋŋonan go sii leat vuoruhan eará áššiid mearkaohcamušaid sadjái.

– Lea leamaš hástaleaddji, danin go mis leat ráddjon resurssat maid fertet vuoruhit. Dáppe lea leamaš guohtunruossu man olles ossodat lea ferten gieđahallat. Ja dat lea čuohcan earret eará mearkaohcamušaide.

Sis leat sullii 280 mearkaohcama mat eai leat gieđahallojuvvon.

Gjølme muitala NRK:i ahte sii leat nannen mearkaohcamušaid bargoveaga čakčii, muhto sis leat olu ohcamušat ja daid meannudeapmi ádjána guhká.

Dál son dadjá ahte áigot vuoruhit mánáid mearkaohcamušaid ja vuoruhit daid ohcanortnegis.

Áigu váidit departementii

Elle Márja Eira ozai mearkka iežas bárdnái 2021, muhto ii su bárdni ge leat vel ožžon boazomearkka.

Son jáhkká ahte doppe lea juoga mii ii doaimma.

– Na mun lean gal álgán jurddašit ahte galggan go váldit oktavuođa departemeanttain gulaskuddat mii lea mii ii doaimma dieppe. Mu mielas ii oro dat áibbas dábálaš ahte go don ozat juoidá, čalat ohcamuša ja galggat vuordit vástádusa máŋga jagi.

Son lea aiddo ožžon reivve stáhtahálddašeaddjis ahte sii soitet geahččat dán ášši boahtte jagi.

– Du bártnáš lea sturron ovdal go mearka boahtá?

– Dat lea konfirmánta boahtte jagi ja hui imaš go sus ii leat mearka, go mearka lea stuorra ja dehálaš oassi eallimis. Dat han lea du identitehta ja lea nu dehálaš dutnje, lohká Elle Márjá Eira.