TINE Davvi-Norgga dalá gávpehoavda logai ahte sámi mánát ohppet dárogiela unnin juo.
Ja dan dáfus eai dárbbaš bidjat sámegiela mielkepáhkaide ahte áddet mii mielkepáhkas lea, nu čálii VG áviisa 2003:s.
TINE jorgalan oainnu
NRK Sápmi čujuha boares artihkkalii, mas TINE ii dáhto čuovvolit evttohusa ahte almmuhit mielkepáhkaid sámegiel čállosiin.
TINE gulahallanjođiheaddji Sindre Ånonsen muitala ahte áiggi ja oaiviliid dáfus dáidá leat olu rievdan dan rájes. Ja dat dahká ahte dál viimmat almmuhit mielkepáhkaid sámegillii ja dárogillii.
TINE gulahallanjođiheaddji Sindre Ånonsen lea duhtavaš prošeavttain.
Foto: Privat– Lihkus lea servvodagas, TINES ja sihkkarit maiddái eará doaimmain eará jurdagat dál dán hárrái go dat mat mis ovdal ledje, ja buorre lea dat, lohká Ånonsen.
Ožžo vel nuppi smiehttanjagi
Giellavahku 2021 oktavuođas lei sáhka sámegiela oažžut páhkaide, muhto ii lean vejolašvuohta duohtandahkat go dalá mielkepáhkaid tiŋgojumit ledje juo sáddejuvvon.
Giđabeallái háleštii TINE ođđasit dán birra ja ságastalle iežaset ossodagaiguin, das ožžo positiivvalaš reakšuvnnaid ahte háliidedje ollašuhttit prošeavtta.
– Lei duođaid somá oassálastit dán prošeavttas ja maiddái oaidnit bohtosiid, muitala Ånonsen.
Dál beasat lohkat mielkepáhkas čállosiid sihke sámegillii ja dárogillii.
Foto: TINESámegielat mielkepáhkat galget šaddan bissovažžan, álggos buvttadit dáid Romssas ja Finnmárkkus. Áiggi mielde lea plána oažžut mielkepáhkaid buvddaide miehtá Norgga.
Presideanta ilus
Sámediggepresideanta Silje Karine Muotka lohká dehálažžan ahte sámi kultuvra oidno mielkepáhkain, go soaitá boktit eambbo sáhkkiivuođa stuorra servvodagas.
– Čájeha ahte min gielas lea árvu, dat lea dehálaš ja soaitá movttiidahttit earáidege čalmmustahttit ja aktiivvalaččat geavahit sámegiela, lohká son.
Muotka sávvá ahte dat dáhpáhuvvá olles Norggas čalmmustahttin dihte sámegiela, seammás sávašii ahte julev- ja máttasámegiella boahtá maid oidnosis.
Sámediggepresideanta Silje Karine Muotka lea ilus go TINE buvttadišgoahtá mielkepáhkaid sámegillii.
Foto: Kirsten Appfjell / Sametinget– Mun jáhkán dá lea lávki ovddasguvlui, ja soaitá ahte TINE jurddaša eambbo dan birra go galget ráhkadit olggoža ođđa buktagiidda, muitala Sámediggepresideanta.
Dehálaš ahte giella oidno
Sámegiella oidno dál buorebut go ovdal, earret eará čalmmustahttá Romssa valáštallansearvi sámegiela das go sis lea kapteaidnabáddi mas leat sámi ivnnit.
Muotka oainnu mielde lea dehálaš ahte sámegiella oidno go lea almmolaš giella riikkas.
Das lea stuorra mearkkašupmi go almmolašvuohta ádde čalmmustahttit sámegiela.
– Lea dieđusge dehálaš, vaikko mii orrut ovdáneamen smávva lávkkiiguin. Muhto dat han leat maid lávkkit ovddasguvlui, loahpaha Silje Karine Muotka.
