Gilivuona guolásteaddji Stein Mauseth lohká ahte leat olu ovdamearkkat mat čájehit ahte buori bivdosajit billašuvvet maŋŋá go dohko ásahuvvojit guollebiebmanrusttegat.
Foto: Nils Henrik Måsø / NRKGilivuona guolásteaddji mielas lea buorre go politiijat dál gártet guorahallat ahte rihkkot go luossabiebmanrusttegat birasgáhttenlága.
– Mii doaivut politiijaid váldit duođas váidaga, vástida Gilivuona guolásteaddji Stein Mauseth.
Norgga Birasgáhttenlihttu dat lea váidán 17 luossabiebmanrusttega politiijaide dan geažil go oaivvildit rusttegiid nuoskkidit mearrabodni.
SalMar Øst guollebiebmanrusttet Dáibárasvuonas (Mårøyfjorden) Davvesiidda gielddas, Nuorta-Finnmárkkus, lea áidna Finnmárkku guollebiebmanrusttet mii lea váidojuvvon.
Filbmen oktiibuot 40 rusttega
– Mii eat vuostálaste guollebiebmanrusttegiid jus dat ásahuvvojit gáddái gitta rusttegiid sisa, lohká Davvesiidda Birasgáhttenlihtu jođiheaddji Terje Pettersen.
Foto: Harry JohansenNorgga Birasgáhttenlihttu lea geasi rájes johtán miehtá Norgga «Miljødronningen» nammasaš fatnasiin, ja govven mearrabotni 40 luossabiebmanrusttega vuolde.
– Filbmema bokte mii leat oaidnán mo duohtavuohta duođai lea, oaivvilda Davvesiidda Birasgáhttenlihtu jođiheaddji, Terje Pettersen.
Su mielas lea surgadis dilli go Birasgáhttensearvi lea ferten bargat dan barggu maid sin mielas eiseválddit livčče galgan dahkat.
– Surgadis dilli
Norgga Birasgáhttenlihttu čuoččuha váidojuvvon guollebiebmanrusttegiid vuolde lea nu ollu mohti - biebmoluossaborramušaid ja - baikkaid geažil, ahte dat hávkada mearrabotni.
Vaikko sin guollebiebmanrusttet Dáibárasvuonas lea dohkkehuvvon, de sadji dattetge ii leat áibbas buorre, dovddasta SalMar Øst guollebiebmanrusttegiid hoavda Ronald Wærnes.
Foto: Nils Henrik Måsø / NRKGuolásteaddji Stein Mauseth guhte eallin agi lea bivdán dan guovllus, ii hirpmástuva jus dat leš duohta maid Birasgáhttenlihttu čuoččuha.
– Mis leat olu ovdamearkkat, maiddái Dáibárasvuonas, mat čájehit ahte guolit buorre bivdosajiin, leat jávkan maŋŋá go leat ásahan guollebiebmanrusttegiid dohko, lohká Mauseth.
– Rusttet lea dohkkehuvvon
SalMar Øst gollebiebmanrusttega hoavda, Ronald Wærnes, ii hálit kommenteret Birasgáhttenlihtu váidaga.
– Mii rehkenastet politijaid gieđahallat váidaga albmaláhkái, Wærnes vástida.
Iige son jáhke politiijaid gávdnat makkárge láhkarihkkumiid.
– Mii han álelassii oskkáldasat čuovvut eiseválddiid gáibádusaid, vástida Wærnes. Seammás muittuha ahte eiseválddit leat dohkkehan sin rusttega nu movt dat lea dál.
