NRK Meny
Normal

14 máná heavvanan fanaslihkohisvuođas

14 máná leat heavvanan fanaslihkohisvuođas geasseleairras Gárjilis Davveoarje-Ruoššas, čállá RT News

Kartsnitt, Lake Syamozero

Lihkohisvuohta lea dáhpáhuvvan lahka Suoma rájá

Lihkohisvuohta gálgá leat dáhpáhuvvan sotnabeaivve maŋŋá go turistafanas gopmánii Syamozero nammasaš jávrris Gárjilis Davveoarji Ruoššas lahka Suoma riikkarájá.

Politiijat leat dutkamin ášši. Gárjil gos lihkohisvuohta dáhpáhuvai, ja Moskva gos mánát ledje eret, leat almmuhan almmolaš morašbeaivvi.

Liikkat galget leat sáddejuvvon girdi mielde Moskvai identifiseremiidda.

Turistafanas galgá leat fávlánan jávrri ala vaikko lei dieđihuvvon fuones dálki guovllus.

Njealjis váldon gitta

RT News dieđuid vuođul ledje oktiibuot 47 máná ja njealje ollesolbmo jođus jávrri alde golmmain fatnasiin. Ii oktage ollesolmmoš leat heavvanan.

Buohkat oassálaste muhtun geasseleairras lahka Suoma riikkarájá.

Njealjis leat váldon giddagassii áššis, ja eiseválddit leat dál viggamin gávdnat geat leat addán lobi fatnasiidda fávlánit jávrri ala.

Eiseválddit leat ásahan katastrofajoavkku áimmahuššat olbmuid geat dárbbašit veahki.