117 jagis eai leat lassánan virggit

Nuorttanáste lea almmustuvvan juo 117 jagi, muhto bargit eai leat gal lassánan. Bláđi doaimmaheaddji Liv Tone Boine lohká leat dušše badjelaš ovtta virggi bláđis, de ii sáhte olus lasihit doaimma. Dattege loaktá son bures doaimmaheaddji virggis.

Liv Tone Boine

Nuorttanáste doaimmaheaddji Liv Tone Boine

Foto: Dan Robert Larsen / NRK
Anne Olli
Journalist

Liv Tone Boine loaktá bures Nuorttanáste doaimmaheaddjin, muhto sávašii dieđosge ahte bláđđái virgáduvvošedje eanet bargit. Dalle nagadivččii Nuortanástte čuovvolit lohkkiid sávaldagaid, ja buvttadit eanet kristtalaš ságaid ja rohkosiid bláđđái.

Bláđđi movttiidahttá ja jeđđe

Doaimmaheaddji Liv Tone Boine sávašii eanet nuoraid lohkagoahtit Nuorttanáste danne go bláđis lea buorre giella ja buorit ságat. Dál čállá Nuorttanáste nuppi máilmme soađi birra, ja died ságaid berrešedje nuorat lohket vái dieđášedje soađi áiggis. Soahte-jagiid ságat leat min iežamet lagaš historjá, danne galggašedje nuoratge daid diehtit.

Nubbi man dihte nuoraide livčče vuogas lohkat Nuorttanáste lea dat ahte bláđis gávdná jeđđehusa jos lossa jurdagat givssidit, go Ipmilsátni jeđđe, lohká Nuorttanáste doaimmaheaddji Liv Tone Boine. Nuorttanásti maid movttiidahttá, oaivvilda son.

Eanet lohkkiid čállosat

Doaimmaheaddji sávašii olbmot čálášedje eanet bláđđái, vaikke iežaset eallimis. Makkár jurdagat sis leat oskkui ja kristtalašvuhtii. Bláđi lohkkit leat dovddahan ahte bláđis galggašedje eanet rohkosat, de áinnas bijašii son daid bláđđái jos lohkkit čálášedje, lohká Nuorttanáste doaimmaheaddji Liv Tone Boine.