NRK Meny
Normal

110 jahkásaš doaibmá ain

110 jagi lea Nuorttanaste juo ilbman sámegillii, muhto dán ilbman ii leat alo leamaš geahpas go ruhtaáššit leat álo gáržžidan doaimma.

Nuorttanaste

Nuorttanaste

Foto: Anne Olli / NRK

Gula jearahallama

Sámegielbláđđi Nuortanásti lea dán jagi 110 jagi boaris, ja nu go dálá váldodoaimmaheaddji Olaug Larsson lohká de eai leat leamaš dattege eanet go čieža váldodoaimmaheaddji dán áigodagas. Gustav Fridjof Lund dat vuođđudii Nuortanáste 1898:s ja vel ain dálge ilbmá Nuortanástii mánnosaččat.

Kristtalaš bláđđi

Nuorttanaste váldodoaimmaheaddji

Olaug Larsson

Foto: Anne Olli / NRK

Nuorttanaste lea kristtalaš bláđđi, ja eanaš sáhka bláđis lea kristtalašvuođas. Bláđi váldodoaimmheaddji navdá ahte go bláđđi čállá kristtalašvuođas, na de eai doarjjo nu ollugat bláđi. Son vuohttá maid ahte sámi poletihkkáratge eai oro berošteamen bisuhit Nuorttanaste go illá juolludivčče bláđđái ruđa. Nuorttanaste váldodoaimmaheaddji Olaug Larsson lohká iežas oaidnán mo man stuorra erohus lea doarjagiin. Nuorttanaste oažžu unnimusat, dát juo muitala makkár oaidnu poletihkkáriin lea kristtalaš bláđđái.

Eaktadahtolaš bargguin ilbmá

Go juo 110 jagis eai leat leamaš eanet go čieža doaimmaheaddji oktiibuot, de mearkkaša dalle dát ahte dát olbmot leat maiddái olu bargan nuvttá. Dálge ii leat dán bláđis eanetgo badjelaš okta virgi, de vel dálge šaddá máŋgii doaimmaheaddji nuvtta bargat. Lihkká lea bláđđi ođasmahtton, ja mánáidsiiddu leat iđihan. Dán dahke sii danne go mánát lea boahtteáigi, lohká Olaug Larsson.

Sáhttá čállit bláđđái

Nuorttanastti leage kristtalaš bláđđi, dasa lohká Olaug Larsson leat vejolašvuođa saddet lohkkiid rievviid, ja diehtalasat sáhttá maid čavgilit sidjiide áššiid maid sii bláđđái čálášedje. Larsson sávašii dieđos eanebuid tiŋgogoahttit bláđi, muitalasttá gal ahte diibmá lassánii sis tiŋgojeaddjiidlohku 50 logiin.