Kimek: – Diet ruhta ii veahket fitnodagaid maidda sankšuvnnat gusket
Fitnodagat leat beahtahallan ráđđehusa 105 miljon kruvnna lassiruđain Nuorta-Finnmárkui.
Kimek lea máŋggaid vahkuid vuordán ráđđehusas gullat iežaset doaimma birra, muhto skurtnjagedje go eai namahuvvon sániin ge.
– Diet ruhta ii veahket fitnodagaid mat leat guoskkahuvvon ráŋggáštusaide Ruošša vuostá, lohká Kimek beaivválaš jođiheaddji Greger Mannsverk.
Sankšuvnnat dahket ahte Kimek lea šaddan rievdadit doaimmas garrasit. 70 proseantta Kimeka ruhtajođus boahtá ruošša guollefatnasiid divodeames.
Mannsverk muitala ahte ledje sihtan bálkábuhtadasa, muhto eai leat gullan das maidige. Leat maid jearran lobi gárvet guokte ruošša guollefatnasa mat leat divohagas, muhto lohket vástádusa hui eahpečielggasin. Kimek ferte de advokáhta váldit veahkkin áddet maid sii besset dahkat.
Loga dárogillii: