105 miljovnna lassiruhta Nuorta-Finnmárkui
Nuorta-Finnmárku oažžu 105 miljon kruvnna lassiruđa dán jagi. Dán leat ráđđehusbellodagat ja Sosialisttalaš Gurutbellodat soahpan.
Ruošša soahti Ukrainas ja ráŋggáštusat Ruošša vuostá dan geažil, leat váddudan ealáhusaid birgejumi Nuorta-Finnmárkkus. Ruhta galgá mannat ásahit bargosajiid ja buoredit fálaldagaid olbmuide.
– Norgga sihkkarvuhtii lea dehálaš ahte Nuorta-Finnmárkkus leat doaimmat, dadjá stáhtaministtar Jonas Gahr Støre.
Finánsaministtar Trygve Slagsvold Vedum dadjá ahte lea dehálaš bisuhit Finnmárkku ja Nuorta-Finnmárkku norgga geahču vuolde go dát leat strategalaš dehálaš guovllut.