Norgga girku áigu seanadišgoahtit
Mannan vahkus geigejuvvui Duohtavuođa- ja soabahankommišuvnna raportta Stuorradiggái. Sámi girkoráđi jođiheaddji, Sara Ellen Anne Eira, muitala ahte girku áigu dál seanadišgoahtit.
– Mii leat álo diehtán ahte girku lea leamaš oassin dan dáruiduhttinpolitihkas mii lea leamaš Norggas. Ja mii leat dieđusge ráhkkanan ahte dát raportta galggai geigejuvvot, earret eará de mii leat ráhkadan dakkár digitálakursa buot Norgga girku bargiide mas dáruiduhttin lea fáddá.
Buot Norgga girku bargit galget oažžut vejolašvuođa loktet iežaset gelbbolašvuođa dáruiduhttima birra dan digitála oahppanreaiddu bokte.
– Mun ja mii girkobealis jáhkkit ahte go olbmuin lea gelbbolašvuohta ja máhttu dan birra, de lea maid mihá álkit bargagoahtit seanadeami guvlui, dadjá Eira.
Sámi girkoráđi jođiheaddji muitala maid ahte searvegottit galget dustet daid olbmuid mat dál leat ožžon iežaset muitalusaid ja vásáhusaid dan rapportii mielde.
– Eat mii dieđe mo guhtege olmmoš vásiha dan ahte dál lea almmolašvuođas sin vásáhusa dan dáruiduhttinpolitihkas. Sis fertet mii maid váldit vára, dadjá son.