Keskitalo:– Dušše gulahallat ii leat čoavddusin áššái
Amnesty Norge oaivvilda ahte Fosen ášši geanohuhttá Norgga riikkaidgaskasaš vejolašvuođa ovddidit olmmošvuoigatvuođaid.
– Dáruiduhttinpolitihkka mearriduvvui visttis min duohken, ja doppe čohkkájit dat áirasat geat, jus livččejit háliidan, livččejit sáhttit instrueret ráđđehusa loahpahit olmmošvuoigatvuođa rihkkumiid.
– Mun čužžon šloahta olggobealde ikte, go Jonas Gahr Støre ja Terje Åsland bođiiga čilget sámi vuoigatvuođaid ovddasteddjiide, manne sis lea boastut. Sámi vuoigatvuođat eai leat nu dehálaččat go el-rávnnji buvttadeapmi, muhto gulahallan boazodoaluin gal lea hui buorre.
– Støre ja Åsland jolgiiba vel mansplainet Fosen boazodoalu oaivilii ja maid sii háliidit. Jonas Gahr Støre, dušše gulahallat ii leat čoavddus áššái, don leat dál 600 beaivvi badjelmearálaš áiggi geavahan, loga raportta, ja jeara alcces, mo don háliidat muitojuvvot?
Nu dajai Amnesty Norgga politihkalaš ráđđeaddi, Aili Keskitalo sártnistis Stuoradikki olggobealde otne Fosen miellačájáhusain.