Dála li NRK Sáme ådå talenta
Niellja ådå tjiehpe li gárvvása boahtte NRK Sáme talentprográmma juohkusij.
Da niellja ådå tjiehpe válljiduvvin 19 åhttse gaskan dán jage, mij la alemus åhtsålåhko dálátjij talentprográmmaj.
– Miján lidjin moadda buorre kandidáhta ságájdahttemij, valla maŋutjissaj lidjin dá nieljes gudi sierraláhkáj buoragit vuosedin berustimijt ja máhtudagájt majt NRK Sábme dárbaj boahtte jagijda, javllá fáhkajådediddje Alice Marie Jektevik.
Akta dajs la lågenanaktse jahkásasj Vetle Knutsen. Sujna li gierraga Divtasvuonan, ja la nuorra ja duosstel julevsábme gænna l valástallamduogásj Bådådjon.
Sån ållagasj journalistihkkaj berus, sihke nehtan ja TV:an.
- Viehka ávvudaláv gå galgav álgget talentprográmmajn. Dat la buorre máhttelisvuohta ienebuv mediafágas oahppat. Munji l buorren gå sæmmi bále oattjov sámegielav åvddånahttet, javllá Knutsen.