Son lea dolkan ahte sápmelaččaid vealahit
Elle Rávdná Näkkäläjärvi, Sámedikki nuoraidpolitihkalaš lávdegotti (SáNuL) jođiheaddji, lea dolkan ahte sápmelaččaid vealahit.
Son lea iežas Facebook-siidui juohkán NRK-ášši Nils Per Henrik Sara birra, gii ii beassan sisa guovtti olgobáikái Oslos, ja oaivvildii ahte bissehedje su go sus lei gákti badjelis.
– Juhken ášši Facebookii danin vai čájehit ahte dakkár dáhpáhusat gevvet miehtá Norgga. Troandimis maid vaikko lea sámi guovlu, lohka Näkkäläjärvi NRK:i.
– Measta juohke háve go mii leat čiŋadan gávttiin gávpogis de vásihit unnit dahje stuorit unohisvuođa, nu ahte jus dán váttisvuođa galgá čoavdit de fertejit eanetloguálbmoga guottut rievdat.
Makkár váikkuhusat dákkár dáhpáhusain sáhttet leat?
– Dákkár dáhpáhusat dagahit ahte mii jurddašit guktii ovdal vuolgit gávpogii gávttiin, dahje ahte eat cokka gávtti gávpogii vai eat oaččo dárbbašmeahttun fuomášumi.
Gažaldahkii ahte boahtá go son joatkit gávttiin čiŋadit, dainna dieđuin ahte sáhttet vaikko makkár unohasvuođaid vásihit, sus lea čielga vástádus:
– Mun gal joatkán coggamis gávtti. Gákti lea vuohkkaseamos bivttas mu mielas, in ge jáhke ahte dát váttisvuohta buorrána dainna ahte sámevuohta ii oidno, lohka Näkkäläjärvi.
