Bivvalat ja arvvit dagahan guohtunroasu
Davvi-Norggas bártidit máŋga orohaga heajos guohtumin dálkkádatrievdadeami geažil ja danne fertejit biebmat bohccuid amaset nealgut.
Dál lea Romssa ja Finnmárkku stáhtahálddašeaddji ja boazodoalu gearggusvuođalávdegoddi duođaštan, ahte Finnmárkkus lea gaskka- ja nuortaguovlluin guohtunroassu.
Muhtin guovlluin lea guohtun lohkkašuvvan ja muhtin guovlluinges lea čeargan nu, ahte bohccot eai nagot čuollat eatnama rádjai. Guovvamánu arvviid ja bivvaliid geažil dat leat guohtumat lohkkašuvvan.
Dál sáhttet orohagat maidda dát guohtunroassu guoská ohcat doarjaga oastit fuođđariid.