Háliida sirdit čuoigamiid davás
Bjørn Roald Mikkelsen háliida sirdit máŋggaid stuorra riikkaidgaskasaš čuoigamiid davás dálkkádatrievdamiid geažil. Son lei norggameašttirgilvvuid gilvojođiheaddji čuoiganbáhčimis mii lágiduvvui Álttás mannan vahkkoloahpa.
Seammás go lea fápmoheahti Eurohpás, de geavahit olu fámu ráhkadit goanstamuohttaga čuoiganláhtuide.
Mikkelsen háliida baicce lágidit čuoigamiid doppe gos lea muohta.
– De livččii lunddolaš ahte čuoiganáigodat álggášii easkka ođđajagimánus dahje guovvamánus, dalle lea buoret muohtadilli Eurohpás. Njukčamánus, ja eandalii cuoŋománus lea fas Davvikalohtas hirbmat buorre čuoigansiivu, dadjá Mikkelsen.