Sámi konsearta Munchmuseas
Jus leat Oslos ja dus eai leat otne plánat, de soaittát háliidit Munchmuseas finadit. Doppe beasat vásihit juoga mii ii dáhpáhuva dávjá.
Vuos, sámi musihka Munchmuseas. Ja de lea vel ovttasbargu guokte erenomáš dáiddalaš ja čeahpes artisttaid gaskkas, namalassii Katarina Barruk ja Elina Waage Mikalsen.
Ubmisápmelačča Katarina Barruka mii gal dovdat bures dál, go su skearru «Ruhttuo» ja šuoŋat mat leat skearrus leat ožžon olu fuomášumi.
Earret eará lea son ožžon fuomášumi sihke Lindmo prográmmas ja P3:s.
– Mun lean nu lihkolaš ahte MUNCH háliidii searvat dán prošektii. Dat mearkkaša hui olu. Dat ii leat nu dávjá ahte sihke Ubmisámi ja mearrasámi kultuvra beassá dákkár lávdái oktanaga, muitala Barruk.
Mearrasápmelaš Elina Waage Mikalsen lea dáiddár ja artista gean soaittát dovdat jus leat oaidnán Blood Forest Family joavkku ovdal.
Son seaguha instrumeanttaid maid ieš lea ráhkadan, jiena ja elektronalaš instrumeanttaid, oktan fantasiijain ja duohtavuođain.
Munchmuseas gulat sudno čuojahit okto, ja maiddái ovttas.