Rámidii sámi miellačájeheddjiid
Sosialisttalaš gurutbellodaga (Sg) ođđa jođiheaddjis Kirsti Bergstøas ledje giitosat ja rápmi sámenuoraide ja luonddugáhttejeddjiide, geat moadde vahku dassái čađahedje miellačájehemiid Oslos.
Sártnistis bellodaga riikačoahkkimii deattuhii Bergstø ahte miellačájehemiid bokte leat nuorat boktán stuorraservvodaga, ja bággen ráđđehusa šállošit váilevaš čuovvoleami Alimusrievtti ovttajienalaš duomus Fovsen-áššis.
– Dán historjjálaš ákšuvnna bokte leat njunuš eiseválddit bággehallon smiehttat Fovsen-ášši birra, ja sávvamis leat eiseválddit maid áđđen juoga maid ovdal eai leat ádden dán áššis, logai Bergstø.
Son dáhtui bellodaga nuoraid geat ledje oassálastán ákšuvnnain, čuožžilit ja rámiduvvot riikačoahkkimis giehtaspeažžumiin.
– Galgabehtet diehtit ahte lean hui rámis dainna bargguin maid dáid miellačájehemiin lehpet dahkan, logai Bergstø.
Son maid deattuhii ahte eanebut stuorraservvodagas leat maid dál ožžon muittuhusa das ahte doppe gos earát vedjet oaidnit ávdin guovlluid luonddus, de earát ges dihtet ahte dá leat guovllut maid sámit geavahit sierranas luondduealáhusaid oktavuođas.
Bergstø lea bajásšaddan Unjárggas Nuorta-Finnmárkkus. Dálá stuorradiggeáigodagas lea son válljejuvvon Akershus fylkkas Stuorradiggái.
Ikte válljejuvvui son ovttajienalaččat ođđa jođiheaddjin Sosialisttalaš gurutbellodahkii. Les på norsk.
