Čájehedje vuostemiela Opera viesus
Lávvordaga doalai ISÁK joavku konseartta Opera viesus Oslos.
Ovdalaš konseartta ledje Fovsen ákšunisttat lebbon duljiid guovdu láhtti Opera viesus, juste nu movt dahke Oljo- ja energiija departemeantta resepšuvnnas moadde vahku dassái.
Sii dolle čorpmaid loktosis ja čurvo dárogillii «Urfolksrett er ikke valgfritt, turbinene må rives nå».
– Mii leat dáppe čalmmustahttime ahte Norgga stáda lea 523 beaivvi rihkkon olmmošvuoigatvuođaid. Eaige leat vel álgán gaikut bieggaturbiinnaid, muitalii Elle Rávdná Näkkäläjärvi NRK:ii.
Dii lohpideiddet fas boahtit ruovttoluotta Osloi jus stáhta ii álgge gaikut turbiinnaid. Lehpet go dan nammii boahtán dál?
Näkkäläjärvi jurdila veaháš ovdalgo vástida mojonjálmmiid:
– Na mii leat goit dál dáppe.