Fállet čovdosa Fovsen-áššis
Fovsen njaarke orohaga boazodoallit leat 2021:is juo fállan bieggafápmo huksejeaddjiide čovdosa Fovsen-áššis.
– Boazodoallit leat mielas diktit daid bieggaturbiinnaid bissut ceaggut muhtun jagiid, muhto eai fal 25 jagi, nugo dálá áigumuš livčče huksejeaddjiin, lohká okta orohaga advokáhtain, Eirik Brønner, Klassekampen áviisii.
Alimusrievtti duomus dat deattuhuvvo ge ahte go juo olles 25 jahkái lea huksejeaddjiin áigumuš váldit eatnamiid, de dat lea ge váldosivva dasa go dát industriija doaibma rihkku Fovsen-sámiid olmmošvuoigatvuođaid.
Huksejeaddji Fosen Vind duođašta áviisii ahte sii ožžo dien fálaldaga. Oljo- ja energiijadepartemeantta duohken dat lea árvvoštallat fálaldaga, muhto dássážii eai leat vástidan dasa maid ge.