Ovddeš suohkandirektevra háliida šaddat teáhterhoavdan
Beaivváš Sámi Našunálateáhter lea ožžon gávcci ohcci teáhterhoavdda virgái.
1. Borna Armanini (45), Oslo, prošeaktajođiheaddji
2. Gunnar Innvær (50), Bergen, čuovgahábmjeaddji
3. Kim-Runar Klodiussen (29), Sážžá, lávdedáiddár ja neavttár
4. Kent Valio (50), Guovdageaidnu, suohkandirektevra
5. Cecilia Persson (58), Grane, Prošeaktajođiheaddji
6. Susanne Andreasen (45), Nuuk Ruonáeatnamis, teáhterhoavda
7. Ari-Pekka Lahti (47), Espoo Suomas, dramaturga
8. Čiegus ohcci (dievdu, 58)
Stivrajođiheaddji Maria Utsi lea hui duđavaš ohcciiguin.
– Mis leat buori ohccit. Dain lea gealbu mii vurdo.
– Man stuora deattu bidjabehtet ahte galgá sápmelaš teáhterhoavdan?
– Dat gal deattuhuvvo, dasa lassin vel sámegiella hálddašeapmi. Muhto dat ii leat gáibádus, dadjá Utsi ja čujuha almmuhustekstii.
Guovdageainnu ovddeš suohkandirektevra Kent Valio lea okta ohcciin.
– Manin leat ohcan teáhterhoavdan?
– Mus lea guhkes hárjáneapmi bajimuš dási jođiheames ja máhtan teáhtera bargogiela eatnigiela dásis.
Valio dadjá ahte teáhter gullá daid ásahusaid searvái maiguin sámit vedjet leat eanemus rámis.
– Livčče somá sihke leat oasálaš dan buori barggus maid juo dahket, muhto maid ovddidit teáhtera stivrra dáhtu mielde.
Valios ii leat teáhterduogáš, muhto lea guhka medias bargan.
– Jáhkán álo dákkár virggiin fertet árvvoštallat maid lea deháleamos máhttit. Jođiheami dahje daid geavatlaš bargguid, maid goitge ii galgga ieš bargat ja man deaŧalaš lea ipmirdit bargosaji bargo- ja buvttagiela.
Utsi muitala ahte eai leat vuos leamaš bargojearahallamat, muhto dat álget ovdalaš beassážiid.
Beaivváš Sámi Našunálateáhter bušeahtta lea 26,5 milijovnna. 2021:s ledje 20 bargi, sis ledje guhttanuppelogis fásta. Borgemánus boahtte jagi fárrejit ođđa vistái Guovdageainnus.
