Sámediggeráđđi evttoha ásahit mánáidviesu Kárášjohkii
Sámediggeráđđi evttoha ásahit Stáda mánáidviesu Kárášjohkii. Sámediggeráđđi oaivvilda ahte lea dehálaš Stáda mánáidviesu ásaheamis sihkkarastit duohta fálaldaga sámi mánáide.
Dalle ferte deattuhit ahte bargiin lea sihke fágalaš gelbbolašvuohta veahkaválddi ja illasteami hárrái, ja sámi giella- ja kulturgelbbolašvuohta, iige dan man olu áššit leat Sis Finnmárkkus, čállá sámediggeráđđi preassadieđáhusas.
Kárášjogas lea jo nanu sámi fágabiras dearvvašvuođas, earret eará lea doppe Sámi našuvnnalaš psyhkalaš dearvvašvuođa gealboguovddáš (SÁNAG) ja spesialistadoavtterguovddáš.
– Ágga ahte leat unnit gažadeamit Sis-Finnmárkkus ii sáhte leat mearrideaddjin dás, go Stuorradiggi lea diŋgon mánáidviesu mii fuolaha sámi mánáid fálaldaga sámi guovddášguovlluin, dadjá sámediggeráđđi Runar Myrnes Balto.
Finnmárkku politiija ávžžuha, ahte mánáidviessu ásahuvvošii Áltái, go sii oaivvildit olles Finnmárku lea sámi guovddášguovlu.
Deanu sátnejođiheaddji Helga Pedersen oaivvilda, ahte Finnmárkku boles lea ádden boastut sámi guovddášguovlluid. Diehttalas dás lea sáhka daid sámi hálddašanguovlluin Deanus, Unjárggas, Kárášjogas, Guovdageainnus dahje Porsáŋggus, dadjá Pedersen.