Neahttaresurssa veahkkin oahpahit sámiid birra
Sámi kulturárbi lea oassi Norgga kulturárbbis, ja buot Norgga skuvllat galget oahpahit sápmelaččaid ja sámi diliid birra. Sámi sisdoallu lea oassi mii lea laktaduvvon fágaide, ja dál lea Sámediggi ja Oahppodirektoráhta ovdánahttán ođđa neahttaresurssa oahpahussii doarjjan, dan čállá Sámediggi preassadieđáhusas.
– Buot oahppit Norggas galget beassat oahppat sámi historjjá, kultuvrra, servodateallima ja vuoigatvuođaid birra. Sámi kultuvra lea oassi min oktasaš kulturárbbis, ja dat lea oahppaplánas čielggaduvvon. Danne lean ilus go Oahppodirektoráhta ja Sámediggi leaba ráhkadan dán resurssa. Dieđán ahte olu oahpaheaddjit leat sávvan eanet doarjagiid ja eanet reaidduid sámi sisdoalu oahpahanbargui. Sávan oallugat atnigohten dán, dadjá máhtoministtar Tonje Brenna (Ap).