Oktasaš sámi gáiddusoahpahusguovddáža
Sámediggi háliida gulahallat Máhttodepartemeanttain vejolašvuođa birra ásahit ođđa guovddáža mii organisere sámi gáiddusoahpahusa.
Maŋŋel go Oahpahusdirektoráhtta mearridii ahte Åarjelsaemien Vierhtiesåafoe ii šat galgga fállat davvisámegieloahpahusa, de lea Sámediggi gulahallan gáiddusoahpahusa birra stáhtaráđiin Tonje Brennain.
– Vuosttaš maid Sámediggi lea dahkan lea sihkkarastit ahte ii oktage oahppi masse davvisámegiela oahpahusa. Sihke Oahpahusdirektoráhtta ja Máhttodepartemeanta leat duođaštan dan, dadjá sámediggeráđđi Mikkel Eskil Mikkelsen (NSR) preassadieđáhusas.
Sámediggi lea cealkán ahte lea dárbu geahčadit gáiddusoahpahusa organiserema ja giellačoahkkanemiid nationálalaččat. Mikkelsen sávvá ráđđehusa maid oaidnit dán dárbbu.
Suomas leat okta dahje guokte aktevrra mat koordinerejit gáiddusoahpahusa ja giellačoahkkanemiid. Mikkelsen oaivvilda nu sáhttit Norgga bealde maid dahkat.
Mikkelsena mielas lea maid dál áigi ahte ráđđehus čuovvula NAČ 2016: 18 – Váibmogiela guorahallama doaibmabidjoevttohusaid.
– Váibmogiella evttohii juo jagis 2016 doaibmabidjoevttohusaid juste dasa, ja dál lea áigi ahte ráđđehusa bealis čuovvulit daid, dadjá Mikkelsen