Hopp til innhold

Kanáda šaddá máksit buhtadusa internáhtamánáide

Kanádalaš eiseválddit šaddet máksit 20,5 miljárdda ruvdnosaš buhtadusa eamiálbmotservodagaide go eamiálbmogat vásihedje illasteami internáhtaskuvllain measta čuođi jagi, čállá NTB.

324 iešguđetge eamiálbmotservvodaga ledje ceggen ášši, mas gáibidedje buhtadusa illastemiid ovddas ja nu ožžoge 20,5 miljárdda kruvnna. Ruđat galget biddjot ii-kommersiealla iešheanalaš foanddaide revitaliseren dihte eamiálbmogiid oahpu, kultuvrra ja giela ja maiddái doarjut sin, geat vásihedje illastemiid vai ožžot oktavuođa fas iežaset kulturárbbiin.

Kanáda stáhta ádjánii menddo guhká dovddastit álbmotgoddima ja daid kollektiivvalaš vahágiid maid internáhtaskuvllat dagahedje eamiálbmotnašuvnnaide.

– Dál lea áigi ahte Kanada ii dušše dohkket dan mii lea dáhpáhuvvan, muhto fárrolaga eamiálbmogiiguin rievdada ja njulge áššiid. Dát soahpamuš mas Kanáda lea mearridan máksit buhtadusa, lea vuosttaš lávki dasa, lohká eamiálbmotjođiheaddji Garry Feschuk preassadieđáhusas.

Brandon Indian Residential School i Canada i 1940.
Foto: Library and Archives Canada

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.