Ole Henrik Magga vuittii Gollegiela 2022
Davviriikkaid sámi giellabálkkašupmi – Gollegiella 2022 geigejuvvo professor emeritus Ole Henrik Maggai. Nu čállá Sámediggi.
Magga lea iežas eallinagi čájehan sámiide ja olgomáilbmái ahte sámegielas lea árvu giellaáŋgiruššama bokte, ja ahte sámegiella lea ealli giella.
Ruoŧŧa geige dán jagi Gollegiella-giellabálkkašumi, mii geigejuvvo logát gearddi. Bálkkašeapmi geigejuvvo ministariid ja sámediggepresideanttaid čoahkkima olis, Stockholmmas, ođđajagimánu 18. beaivvi 2023.
– Sámegielaid seailluheapmi ja ovddideapmi lea hui dehálaš. Ole Henrik Magga lea guhká leamaš stuora ovdagovva sámi giellageavaheami dáfus ja danin lean hirbmat miháš dainna go otne beassat geiget Gollegiella bálkkašumi Ole Henrik Maggai, dadjá Ruoŧa kulturministtar Parisa Liljestrand Sámedikki preassadieđáhusas.
