Bovdejit nuvttá juovlaávvudeapmái
Reantu lea gorgŋon viđa háve ovtta jagis. Dasa lassin lea borramuš, elrávdnji ja boaldámuš divron. Ollugiin lea dál heajut ekonomalaš dilli, ja danin eai illut juovllaide.
NAV oažžu eanet ohcamušaid, ja eanet olbmot váldet singuin oktavuođa.
– Mii ávžžuhit buohkaid, geain lea váttes ekonomalaš dilli, váldit oktavuođa NAV:in, dadjá Kari Mariann Henriksen guhte bargá NAV-bagadeaddjin Guovdageainnus.
Geahpidan dihte ekonomalaš dili, muhto eanemusat eastadan dihte aktovuođa, bovdeba Ida Halvorsen ja Nils Andreas Tornensis Guovdageainnu ássiid nuvttá oktasaš juovlaávvudeapmái.
– Dáppe dovdet ollugat aktovuođa. Soapmásat leat fárren deike, earáin fas leat mánát guođđán ruovttu. Muhtimat leat leaskkat ja muhtimat fas dušše akto, dadjá Ida.
– Ii oktage galgga akto juovlaruohta ja moai sávve ahte ollugat servet dasa, dadjá son.
