Vaššifalleheapmi sámi čájáhusa vuostta

Mannan vahkkoloahpa vihahuvvui sámi čájáhus ”Colors of Colonialism” Stockholmmas. Juo beaivvi maŋŋá leai soames sárggodan vašálaš áitagiid čájáhusplakáhtaide, čállá SVT Sápmi.

– Lei balddehahtti ja hui unohas, dadjá Emma Göransson, dáiddalaš jođiheaddji Aerpies.

Earret iežá leai saomes málen oaiveskálžžu ja čállán ”Brigand” alit-fiskes teavsttain. ”Brigand”-sátni mearkkaša sullii bandihtajoavku ja lea rasisttalaš sátni.

Dáhpáhus lea almmuhuvvon politiijaide.

Sámi mánáidgirjjálašvuođa seminára Oslos

Sámedikki girjerájus, juoigiid searvi ja Norgga mánáidgirjeinstituhtta lágidit odne rabas seminára.

Njálmmálaš muitaleapmi ja luohti lea leamaš dehálaš oassi sámi kultuvrras.

Máinnasteapmi ja luohti lea čohkken olbmuid sihke gulahallama ja guoimmuheami bokte. Lea maiddái leamaš dehálaš oassi sámi mánáid bajásgeassimis. Semináras digaštallet earret eará, movt otná njálmmálaš árbevierru váikkuha sámi mánáid- ja nuoraidgirjjálašvuođa.

Seminárii servet sihke juoigit, sámi girječállit, sámediggeráđđi, Cizáš – Oslo sámi mánáidgárdi ja earát.

Lea vejolaš čuovvut seminára dás.

Girdit ain maŋŋonan davvin

Vaikke vel leatge rahpan girdijohtolaga Mátta-Norggas, de dat dagaha váttisvuođaid girdijohtolahkii davvin.

Olu girdit leat maŋŋonan mat livčče galgan girdit Davvi-Norgii dahje Mátta-Norgii. Avinor.no neahttasiiddus oainnát mat girdit leat maŋŋonan.

Mátta-Norgga girdijohtolat bissehuvvui duorastaga iđida go Oslo áibmogozihanguovddážis ledje teknihkalaš sivat.