Ittjij diede julevsámegiella gávnnuj – dálla l gielav oahppam ja guoradallam
Hanna Danbolt Ajer (30) ittjij diede julevsámegiella gávnnuj åvddål lij guoktalåkgålmmå jage vuoras. Suv mielas sáme ássje lij tjiehkusin dahkam gå skåvlåv váttsij. Sån la giellaberustiddje, ja dan diehti sunji dåbddo nievres gå ij lim julevsámegiela birra åvvånis gullam. Valla dálla l dåktårgrádav tjállám julevsáme grammatihka birra ja duodden oahppam sámástittjat. Ij la nav ålos gudi l julevsámegiela grammatihkav guoradallam, ja danen la suv mielas dárbbo guoradallat. – Jus julevsámegielav buohtastahttá ietjá, stuoráp gielajda de ij la nav ållo dutkam mij la dahpaduvvam, ja dat merkaj la ienep majt hæhttup dahkat dádjadittjat gåktu giella doajmmá, javllá Ajer gut ietjas guoradallamav åvddånbuvtij vásse máno, ja dåssju nágin biejve duogen Nuortta universitiehtan barggagoahtá. Gulldala ienebuv Julevmagasijnan.