Julevsáme guovdátja direktørra Lars Andreassen lij mánnodagá mañen sjiehtadallama vuolláj tjállemin Árrana, Sáme allaskåvlå, Sáme låhkåmguovdátja ja Hábmera suohkana gaskan.
Sjiehtadallam mij ulmijt la julevsáme mánáj ja nuoraj oahppambirrasav nannitjit julevsáme profijllaskåvlå åvddånime baktu. Duodden ájn vil sihkarasstet vaj julevsáme máná ja nuora oadtju ådåsmahtedum oahpponevvagijt.
– Aktan galggap oahppamfálaldagájt ja oahpponevvagijt åvddånahttet, ja lagábuv aktisattjat barggat. Sáme allaskåvllå la má vuostasj stáhta oassálasstijs mij de aktisattjat dán láhkáj galggá barggat, javllá dudálasj direktørra.
Andreassen nammat aj Nuortta universitehtav mij åvddåla åhpadimev la fállám, valla allaskåvllå sihtá njuolgga viehkken liehket åhpadimfálaldagáv fálatjit.
Sáme máhtudahka fájllu
Hábmera suohkanoajvve Britt Kristoffersen (Gb) la ávon moadda oassálasste aktan båhti viehkedittjat julevsáme gielav åvddånahtátjit, ja viehkken oahpponevvagijt åttjudime.
Kristoffersen mujttádahttá Hábmera suohkan la ájnna suohkan mij de julevsáme gielav háldat, ja dajna l dát fálaldahka, ja dát sjiehtadus masi semadij, nav ájnas.
– Mij lip gievras oassálasstijs tjanádum jus galggá gielav åvddånahttet ja suoddjit. Dárbbo l sierraláhkáj stuorak. Mij dárbahip ienep ulmutjijt sáme máhtudagáj. Ja dát sjiehtadus dilev giehpet åhpadusáv gattsatjit, javllá suohkanoajvve Britt Kristoffersen.
Aktisasjbarggo mij la vuojto bielen
– Riek ávvudahtte gå de ienep máhttep aktan barggat Hábmera suohkanijn ja julevsáme guovdátjijn Árran oahppofálaldagájt hábbmigoahtet julevsáme guovlluj. Ja ienep systemalattjat barggát fáhkavejulasjvuodajt låpptidit.
Dav javllá Sáme allaskåvlå rektor Laila Susanne Vars guhti aj diehtá mav dagu suohkan ja Árran dárbahibá.
– Mån diedáv suohkan dav dárbaj, ja Árran sámegiela barggijt dárbaj. Nav vaj mij gájka vuojttep dákkár aktisasjbargujn.
Vars jáhkká juo tjavtjan 2023 lij jådon julevsáme álggokursaj, valla gatjálvis la goassa barggijt nahki åttjudit, ja duodden studentajt gávnnat.
– Sávav gal ålos åhtsi dájda oahppofálaldagájda ma dal båhti gå de dajt ásadip, javllá Vars.
Duodden vuojnná Laila Susanna Vars ietjá åvddånahttemav mij guosská oahpponevvaga suorgen mij de julevsáme profijllaskåvlå ja Ájluovta skåvlå tjadá ásaduvvá.