Bivdá dronnet Margrethes veahkki
Norgga sámediggepresideanta Aili Keskitalo lea čállán reivve Dánmárkku dronnegii gos bivdá veahkki máhcahit Poala-Ándde/Anders Poalssona meavrresgári Sápmái, mii duogoštuvvojuvvui ja sáddejuvvui Københámmanii 1692:s. Dan rájes dat leamaš oassin Dánmárkku nášunalamusea čoakkáldagas. 1979:s luoikkai Nášunálamusea meavrresgári Sámiid Vuorka-Dávvirii ja RiddoDuottarMuseaide Kárásjogas. Dát luoikkahanšiehtadus nohká juovlamánu 1. beaivve dán jagi. RiddoDuottarMuseas dáhttot bisuhit meavrresgári Kárášjogas ja danin bivde veahkki Sámedikkis.