Rievssatbivdu unnon beliin
Rievssatbivdit Finnmárkkus leat dieđihan báhčán 14.400 rievssaha ja 5.230 girona dássážii smávvafuođđobivddus. Vásáhusaid vuođul lea dál 95 proseantta bivddus čađahuvvon, nu čállá Finnmárkku opmodat preassadieđáhusas. Oktiibuot ledje golggotmánu 17. beaivvi aktiverejuvvon 31.652 bivdobeaivvi 2016 čakčii. Bivdoboađus heive oktii rievssatlohkamiin mii čađahuvvui borgemánu loahpageahčen. Finnmárkku rievssatmáddodat lea oktiibuot njiedjan sullii 70 proseanttain 2015 rájes, ja dát vuhtto bivdostatistihkas. Bivdologut čájehit ahte leat báhččon beali unnit rievssahat go seamma áiggi diibmá, dadjá meahccehálddašeaddji Even Borthen Nilsen.