Dáhtošii váidit gufláriid
Organisašuvnnat, mat čuoččuhit iežaset sáhttit dálkkodit borasdávdda, galggašedje váidot. Dan oaivvilda Romssa fylkkadoavttir Svein Steinert. Mannan vahkkoloahpa Alternatiiva meassuin Romssas dat Keshe Foundation organisašuvdna lohpidii olbmuide ahte sáhttet plasmateknologiijain dálkkodit borasdávdda. Nu čállá iTromsø -áviisa. Steinert lohká iežas váldimin oktavuođa Stáhta dearvvašvuođabearráigeahčuin gáibidan dihtii almmolaš áššáskuhttima. Keshe Foundation bealis dattetge dadjet ahte ii leat sin vuođđudusa oaidnu ahte sáhttet dálkkodit borasdávdda.