Hávdáduvvui 350 jagi maŋŋá go jámii
1993:s gávdne nuorat olbmo oaiveskálžžu Jámetmiellis, Guovdageainnus. Odne easka hávdáduvvui skálžu Guovdageainnu kirkus, maŋŋá go lea Riddoduottarmuseaid hálddus leamaš das rájes go gávdnui. Skálžu gullá albmái gii jámii 1650-logus, ja ii oktage dieđe almmáiolbmo identitehta. – Lei vuogas hávdádit skálžžu, go lea han giksin leamaš midjiide – ii sámi árbevierus galgga jápmán olbmuid dávttiid ja skálžžuid vurkkodit, dat galget eatnamii, dadjá Guovdageainnu gilišillju jođiheaddji, Johan Ailo Hætta. Sátnejođiheaddji Johan Vasara ja sámediggepresideanta Aili Keskitalo leigga gisttaguoddit.