Eai beasa vuos álgit roggagoahtit
Sirges čearu ságadoalli Jakob Nygård lea ilus go jokkmokk iron mines ruvkefitnodahkii ii leat vuos addon lobi roggagoahtit minerálaid Gállohis, Johkamohki gielddas. Ruota ráđđehus lea odne gieđahallan ášši ja sádde dan fas ruovttoluotta bergstatenii, eiseváldi mii gieđahallá ruvkeáššid ruoŧas. Dát de guorahallá ášši viidaseappot. Ruvkeplánat leat bohciidahttán stuora nákkuid. Sivva manin ráđđehus dáhttu ođđasit guorahallat ášši lea go ruvkedoaibmaláhka lea dán jagi ođasmahtton ja dat mearkkaša ahte fertejit guorahallat mo ruvki váikkuha viidát guovlluide go ovdal. Leat guhká geahččalan čilget ahte ruvkedoaibma lea olu stuorát ášši go dušše ieš ruvkeráigi, lohká sirges čearu ságadoalli Jakob Nygård.