– Eai beasa seamma bargui álgit
Dat oljo- ja gássaealáhusaid bargit, geat maŋimuš áiggiid leat massán bargguideaset, eai sáhte vuordit ahte besset fas bargagoahtit seamma bargosajiin lagamuš boahtteáiggis.
Lea Norgga oljo- ja gássasuorggi searvvi hálddahuslaš direktevra, Karl Eirik Schjøtt-Pedersen, gii dán cealká.
Son dadjá, NTB-dieđuid mielde, ahte Norgga oljo- ja gássaealáhus lea gal juo čađahan dan vearrámus áiggi dál, ja dál lea gal ealáhusaid eavttut ja dilit fas buorráneamen.
Datge eai boađe fitnodagat virgádit justa seamma olu bargiid, go maid šadde dáhttut heaitit diibmá.