Ruonáeatnamis politihkalaš moivi
Máŋga ministara leat geassádan čájehandihte vuostemiela Ruonáeatnama ráđđehusjođiheaddjái Aleqa Hammondii.
Hammond lea dutkojuvvome go galgá leat geavahan almmolaš ruđaid priváhta doaimmaide, earret eará bearašmátkkiide.
Dál leat máŋga ministara guođđán ruonáeatnama ráđđehusa go lohke ahte sii eai sáhte bealuštit Hammonda daguid. Guovttes leaba seamma bellodagas go Hammond. Riikkadiggi lea mearridan ođđa válgga skábmamánu 28. beaivvi, go ráđđehusas ii leat šat eanetlohku Riikkadikkis.
Hammond lea dieđihan ahte son heaitá Siumut-bellodaga jođiheaddjin ja son lea maid virgelobis dassážii go ášši su vuostá čielgá.