Sámegielain geasuhit turisttaid
Davvi-Norggas leat badjelaš njealljelogi fitnodaga ovttasbargan oččodit eanet turisttaid davás. Sii leat hábmen diehtojuohkingihppaga mas muitalit makkár sámi vásahusaid turisttat ožžot go bohtet davás. Maiddái sámegiella lea guovddážis dán prošeavttas, go stuorit plákahtain galgá sáme- ja eŋgelasgiella oidnot.
Deatnulaš Ellinor Guttorm Utsi lea prošeavtta stivrenjoavkku jođiheaddji, ja son jáhkká ahte sámi fitnodagaide lea buoremus go sápmelaččat ieža leat mielde márkanfievrrideame daid.