- Mu mielas lea buorre go dál leat bargagoahtán ja leat bidjan prošeaktajoavkku dáinna bargat.
Gal dat lea ge dárbu čohkket Áillohaččat dáidaga ja publikummii han lea maid issoras ovdamunni gávdnat buot ovttasajis.
Dan lohká Lásságámmi stivrrajođiheaddji Willy Ørnebakk.
Máksá 15 million ruvnna
Huksen-plánat leat buori muddui gárvásat, ja dál lea dan 15 milliuvdnasaš máksi visti ruhtadeapmi, dat stuorámus gažaldat, lohká sátnejođiheaddji Klemet Erland Hætta.
50 njuohtama
Guovdageainnu suohkan oaččui 200:s 50 njuohtama skeankan Áillohaččas, muhto Nils Aslak Valkeapää alláárvosaš dáidágis ii leat dál dohkkálaš čájáhusbáiki.
Dál heangájit njuohtamat suohkanvisttiid seinniin. Moadde leat dearvvašvuođa guovddážis, earát skuvllain ja muhtin govat ges suohkanviesus.
Váilu sihkarvuohta
Seammas eai leat govat mo ge sihkaraston dain báikkiin gos leat.
Suohkan lea juo 2002 rájes bargan sierra dáiddagalleriija oččodit suohkanii, muhto ii leat vel ceagganan sierra viessu.
Ovttasbargu Lásságámmiin
Lásságámmi vuođđudusas lea juo muhtinlágan ovttasbargu Guovdageainnu dáiddaviesu bargojoavkkuin.
Lásságámmi stivrajođiheaddji Willy Ørnebakk lohká ahte iežaset bealis ulbmilin vel eambbo dovddusin dahkat Áillohačča dáidaga, ja de lea vuogas nannet ovttasbarggu Guodvageainnu suohkaniin.
- Vurdet ođđa viesu
Dál vuordá sátnejođiheaddji Klemet Erland Hætta ahte ožžot ruhtadeami, vai beasašedje dáidaga vurket albmaládje.
Sátnejođiheaddji mielas livččii buoremus oažžut almmolaš ruhtadeami dáiddavissui, muhto sii leat maid suohkana bealis oččodeame priváhta ruhtadeaddjiid, vai dáiddadállu jođánit ceagganivččii.