NRK Meny
Normal

Ámerihkálaččat heahpanit

Ihttin ávvuduvvo USA našonálabeaivi stuorra riemuiguin. Máŋga ámerihkálačča almmatge heahpanit riikkaset ja presideantta George W. Bush (govas) dihtii.

George Bush
Foto: JONATHAN ERNST / Reuters

USA lea guhká leamaš máilmmi fámoleammos riika ja lea mearkkašan olu máilmmehistorjái. Dát govva lea almmatge sakka durddiduvvon go dálááigge historjá čállo.

Ámerihkálaččaid iežaset mielas leat olu ákkat manne galggašedje heahpanit riikkaset geažil, čállá namahis olmmoš kommentáračállosis mii lea almmuhuvvon áviissas Länstidningen Östersund .

- Olu boasttovuođat

Dá leat muhtin dáhpáhusat man geažil ámerihkálaččat heahpanaddet:

- Iráhka ja Afghanistana okkupašuvdna ja seaguheapmi Somaliija ja Palestiinná okkupašuvdnii.

- Soahteáitta Irána, Venezuela ja Boliviija vuostá.

- Militeara veagaid lasiheapmi ja ođđa atomvearjjuid hutkan.

- Sis ii leat mihkkege man dihtii leat rámis mii guoská iežaset riikii, go historjjá rihkkumat olmmoščeardda vuostá geardduhuvvojit ohpihii aht`ohpihii. Dás namuhuvvo Filippiinnaid koloniseren, terrorbombemat Hiroshimas, Dresdenis ja Nagasakis, Vietnamsoahti ja demokráhtalaš stivremiid muosehuhttin Iránas ja Chiles.

Dárbbašit doarjaga

Ámerihkkálaččat geat vuostálastet riikkaset olgoritpolitihka, mas máilmmestivrejupmi lea mihttomearrin, dárbbašit buot riikkaidgaskasaš doarjaga maid sáhtášit oažžut.

Fargga sáhttá álggahuvvot soahti Irána vuostá. Vuostálastot seammá jitnosit go vuostálasttiimet Iráhkasoađi. Justa dán beaivve lea riekta, demokratiija namas, vuostálastit USA olgoritpolitihka, dan bilideaddji váikkuhusaid máilmmi álbmogiidda ja dan olmmošvuoigatvuođaid rihkkumiid.

Mii eat galggašivčče vuovdit vearjjuid dán riikii. Mii galgat jitnosit vuostálastit dan vuogi mo politihkalaš fáŋggat gieđahallojit ja gáibidit vearjogeahpedeami miehtá máilmmi.

Nu ávžžuha namahis čálli otná Länstidningen Östersund áviissas.

Fuomáš! NRKs ii leat ovddasvástádus buot sisdollui siidduin mat leat ráhkaduvvon olggobeale NRK-vuogádaga.