NRK Meny
Normal

- Sus leat olu árvalusat

Árja vállje sámediggepresideanta evttohasa dáid basiid. Bellodaga sámediggejoavkku čálli Jon-Christer Mudenia (21), lohká bellodaga evttohasa Inger Eline Eriksen viššalit fuolahit sutnje bargguid.

Inger Eline Eriksen

Árjja Inger Eline Eriksen sáhttá lávvardaga váljjejuvvut bellodaga presideanttaevttohassan.

Foto: Pressebilde / Árja

– Inger Elines leat olu jurdagat ja muhtimin measta beare olu árvalusat oktanaga, árvala Mudenia veahá leaikkas.

Son lea beannot jagi leamaš Árjja sámediggejoavkku čálli.

Mudenia rápmu Kárášjohkalačča Inger Eline Eriksena, guhte lávvardaga jáhkkimis šaddá bellodaga ođđa sámediggepresideanta evttohas, go dálá parlamenáralaš jođiheaddji Laila Susanne Vars guođđá politihka.

– Vaikko Inger Elines sáhttet leat olu árvalusat oktanaga, de lea son jurddašeaddji ja dárkil, deattuha Mudenia.

Kárášjogas liige jahkečoahkkin

Árjja liige jahkečoahkkin lea lávvardaga Kárášjogas ja doppe nammadit earret eará bellodaga presideantta evttohasa.

Árjja nubbijođiheaddji Per Erik Mudenia duođaštii moatti vahkku áigge ahte bellodaga Sámediggeáirras ja bellodaga stivrralahttu, Inger Eline Eriksen, lea miehtan vuolgit bellodaga presideanttaevttohassan. .

Ii soaitte joatkit čállin

Jon-Christer Mudenia ii leat sihkkar lea go son šat bellodatčálli maŋŋá boahtte čavčča Sámediggeválggaid.

– Lean jurddašan oahpaheaddjiohppui álgit, nu in sáhte šat čállin gal joatkit, muhto in várra guođe sámepolihka gal oalát, lohká nuorra bellodatčálli.

Lávvardaga searvá son liige jahkečoahkkimii Kárášjogas.

– Šaddá hui gelddolaš oaidnit manná go čoahkkin njuovžilit, dan goit sávan loahpaha Mudenia.